Category Archives: Hendingar

Eit tilbakeblikk på Bergenskonferansen

Laurdag 25. og sundag 26. april var det duka for Bergenskonferansen ved Høgskolen i Bergen.

Konferansen handla om nynorsk i samanheng med både norskfaget i lærarutdanninga, kommune- og institusjonsstruktur og ikkje minst – Bergen som nynorskbyen i Noreg.

Rektordebatt: Rektor ved Høgskulen i Volda, Per Halse; rektor ved Universitetet i Bergen, Dag Rune Olsen; rektor ved Høgskolen i Bergen, Ole-Gunnar Søgnen.

Rektordebatt: Rektor ved Høgskulen i Volda, Per Halse; rektor ved Universitetet i Bergen, Dag Rune Olsen; rektor ved Høgskolen i Bergen, Ole-Gunnar Søgnen.

På laurdags ettermiddag diskuterte desse rektorane kva språklege konsekvensar institusjonsstrukturen kunne ha for nynorsken. Det var nokre ting me var meir samde i enn andre.

Rektor ved Høgskulen i Volda sa noko svært fornuftig om at det ikkje naudsynleg var størst mogleg einingar som var best, so det me følte at me laut dela på twitter med ein gong:

Rett etter rektordetbatten, utan nokon pause mellom, fór me vidare over på Bergen som nynorskbyen i Noreg. Det var kanskje noko uklårt for nokre kva ein meinte med at Bergen skulle vera nynorskby, men ein kan seia det nokso stutt: Ein vil gjerne at nynorsken skal vera synleg i bybiletet, samstundes som ein skal ha kulturelle tilbod òg – mellom anna nynorskteateret Hordaland teater. Og so vil ein sjølvsagt sjå Odda-modellen verta innført i Bergen ogso. At Bergen rett og slett skal vera nynorskhovudstaden i Noreg.

Debatten hadde med ein del politikarar, Terje Breivik, stortingsrepresentant for Venstre; Oddny Miljeteig, nestleiar i Sosialistisk Venstreparti og byrådsrepresentant; Kjersti Toppe sit på Stortinget for Senterpartiet; Birthe Eriksen, styreleiar i Hordaland Teater og ho var vorten nynorskfrelst Høgre-politikar medan ho sat på fylkestinget! Og Astrid Olsen, leiaren i Hordaland mållag.

Debatten hadde med ein del politikarar, Terje Breivik, stortingsrepresentant for Venstre; Oddny Miljeteig, nestleiar i Sosialistisk Venstreparti og byrådsrepresentant; Kjersti Toppe sit på Stortinget for Senterpartiet; Birthe Eriksen, styreleiar i Hordaland Teater og ho var vorten nynorskfrelst Høgre-politikar medan ho sat på fylkestinget! Og Astrid Olsen, leiaren i Hordaland mållag.

 

Det beste var jo at under denne innleiinga, kom Odda-modellen opp (språkdelte klasser på ungdomstrinnet og i vidaregåande, noko det berre er lovkrav om i barneskulen), og då snakka Terje Kollbotn so varmt om han at Høgre-politikar Eriksen inviterte han på møte i Bergen Høgre for å snakka om modellen, eller halda eit vekkingsmøte. Han merka seinare at det var fyrste gongen Høgre hadde invitert han med på noko som helst, sidan han sjølv er Raudt-politikar i heimkommunen Odda.

Frå venstre: Ingar Arnøy, skulemålsskrivar i Noregs Mållag; Morten Rønning, høgskulelektor ved Høgskolen i Bergen; Gudrun Kløve Juuhl, rådgjevar ved Nynorsksenteret; og høgskulelektor ved Høgskolen Stord/Haugesund, Hege Myklebust.

Frå venstre: Ingar Arnøy, skulemålsskrivar i Noregs Mållag; Morten Rønning, høgskulelektor ved Høgskolen i Bergen; Gudrun Kløve Juuhl, rådgjevar ved Nynorsksenteret; og høgskulelektor ved Høgskolen Stord/Haugesund, Hege Myklebust.

Den siste av paneldebattane på laurdagen, var om norskfaget i lærarutdanninga. Det var både interessant og til dels sjokkerande å høyra på kva dei hadde å seia. Mellom anna at det ikkje er obligatorisk å ha norsk på grunnskulelærarutdanninga for 5.-10. klasse, og at ein dessutan kunne få fritak frå til dømes nynorsk, om ein hadde hatt fritak på vidaregåande (dette galdt ogso glu 1.-7.). So i teorien, og til ei viss grad i praksis òg, kan ein koma gjennom lærarutdanninga ved kva som helst slags høgskule i Noreg – utan å kunna båe skriftspråka! Og det verste er: dei som ikkje kan båe skriftspråka og kjem seg gjennom studiet er like kvalifisert som einkvan annan – på papiret (dette har noko med at nynorskkrava i regelen er forprøver og ikkje eigne eksamenar, og at ikkje alle kommunane har vett til å krevja nynorskkompetanse),  og kan dimed få jobb i ei nynorskklasse utan å vera røynd i språket.

Før (eller vert det etter?) møteslutt  laurdagen, so kom Frode Grytten og underheldt oss, han hadde med to musikarar og las nokre nokso stutte noveller, medan dei song og spelte.

Frode Grytten med band

Frode Grytten med band

Etter Grytten var me ferdige på høgskulen for dagen, og då var det av garde for å skifta kle (og for nokre var vel sminking nokso sentralt), og koma oss i retning Grand Hotel Terminus for sosialt samvære og middag.

Det var svært og flott på Grand Hotel Terminus

Det var svært og flott på Grand Hotel Terminus

Det var ein røynleg festmiddag, kan ein vel seia: For det var tre rettar, og det var ikkje godt å veta kva slags gaffel som skulle brukast til kva. Føreretten var i alle fall kylling og noko kaninmat, medan hovudretten, for ein gongs skuld var fisk, av typen laks. Og desserten er eit stort mysterium, med det var godt då, det likna kanskje mandelpudding, men utan mandlar.

Det vart ein hyggjeleg kveld, me fekk henga med vaksenmållagsfolk, og nokre av oss fekk noko godt i glaset òg. Og det var jammen det litt lått ogso! Is-mannen, Øystein Skjæveland underheldt oss med «dagsnyttmeldingar», og me fekk ogso etter kvart høyra Terje Kollbotn snakka om Odda-modellen. Men det vart ikkje seine kvelden, brorparten drog frå hotellet i ellevetida, og nokre få lengde kvelden med  ein liten tur ut i byen.

Sundags morgon. Ikkje alle var like snøgge med å koma attende til møtestart, det var vel litt lite svevn for somme. Det var nemleg klokka 09.30 det byrja, og då er det vel ein del som lyt stå opp i otta.. (men underteikna kom seg tidsnok opp). Og det gjorde ogso ordstyrarane:

SmiB-leiar, Marta Nagel-Alne og Øystein "vesletræl" Sandve var ordstyrarar for dagen.

SmiB-leiar, Marta Nagel-Alne og Øystein «vesletræl» Sandve var ordstyrarar for dagen.

Denne tidlege sundagsmorgonen, var det kommunereforma som vart diskutert. Det var fyrst ei innleiing ved Jan Olav Fretland, førsteamanuensis ved Høgskulen i Sogn og Fjordane, før ein gjekk over på ordskifte, med både leiaren i Noregs Mållag, Marit Aakre Tennø, Kjersti Toppe frå Senterpartiet og Olav Kobbeltveit. Der fekk me nokre innspel på kva kommunereforma kunne ha for nynorsken.

Me var ogso svært aktive på instagram, og dette er panelet som snakka om

Me var ogso svært aktive på instagram, og dette er panelet som snakka om kommunereforma.

Fretland la vekt på at me er sopass mange nynorskbrukarar, og at det då gjev oss ein heil del marknadsmakt, me må berre ha hug til å krevja henne.

Og Olav Kobbeltveit som var ordførarkandidat i Fjell kommune på Sotra, han meinte at «ein bør på ny definera innhaldet i ein nøytral kommune, nett no er det lik bokmål», so då byggjer vel del litt på det Fretland hadde nemnt om at «det må til ein revisjon av mållovi».

Ordførarkandidaten i Fjell meinte at all samanslåing ikkje trong vera negativt for nynorsken, han hadde tru på at Sotra som eigen kommune i seg sjølv kunne hjelpa for nynorsken på øya.

Og kva skal ein seia? Det er inkje eit skikkeleg ordskifte utan at det vert kasta ljos på Odda-modellen:

Ordskiftet tok sopass tid at pausen vart både utsett litt og avstutta, men det er jo eit luksusproblem!

Det var ogso ei innleiing om nynorskforsking, det synte seg at ein gjerne ynskte meir forsking på nynorsk. Men det hadde vore eit problem at det for somme forskarar kunne sjå ut som å vera eit tingingsverk frå Noregs Mållag.

Heilt til slutt var det ei innleiing om media og nynorsk, sidan hovudinnleiiaren ikkje var til stades, so stod kommentatoren Olav Kobbeltveit fram og snakka. Han snakka i all hovudsak om nynorsk i Bergens Tidende. Det hadde vore meir eller mindre frislepp på nynorsk i bladet sidan 70-talet, men at ein og annan bladstyrar (redaktør) hadde prøvd seg  – og møtt hard motstand frå nynorskjournalistane. Eine bladstyraren trekte seg tilmed stutt tid etter han byrja. Men poenget var at ein laut passa på i framtida. Og grunnen til at ein lét dei nynorske bladmennene halde fram, var sidan omsetjinga gjekk opp. Det hadde òg gått sameleis etter ein slapp nynorsken til på Alexandra hotell i Loen og Lerum syltetøy frå Sogn. «Det verkar meir ekte», kom ein vel fram til.

Tilskipinga gjekk på overtid, og nærare halv to vart det av garde for å få seg litt lunsj.

Det yngre bordet (det bordet med definitivt lågast snittalder).

Det yngre bordet (det bordet med definitivt lågast snittalder).

Det ein sakna på denne tilskipinga var meir tid, og ikkje minst, meir synging. Me fekk songhefte, men me brukte det berre under festmiddagen.

Bergenskonferansen 25.-26. april

Laurdag 25. og sundag 26. april skipar Bergen mållag i samband med Høgskolen i Bergen til Bergenskonferansen.

På konferansen tek ein mellom anna opp kva konsekvensar institusjonsstrukturen i høgare utdanning kan ha for nynorsken, det tek dei opp på laurdagen, medan dei spør om nesten det same på sundagen, berre då er det kommunereforma som står i sentrum.

Attåt mykje fagleg interessant stoff, so skal det òg vere ein kulturkveld laurdagen, kor mellom andre Frode Grytten kjem. Og det vert nok artig!

Det er berre å sjekke programmet og melde seg på her – innan 19. april! (Det vart nyleg kjent at dei lengjer fristen fram til sundagen før)

Og eg kan tilmed nemne at me dekkjer studentprisen for dei som er medlem hjå oss! So då er det berre å take turen.

Er du ikkje medlem? Send kodeord NMU og namn, e-post og fødeår til 2090 (kr. 50,-, dekkjer kontingenten ut 2015). Eller du kan gå inn på målungdomen sine nettsider og fylle inn eit skjema der.

E-posten med rekning og sånn, treng de berre å vidaresende til smib hjå nynorsk punkt no, so ordnar me med betalinga.

Veke utan pause

IMG_0373

Vesletrælen testa sine eigne bakekunstar.

Etter ei relativt rolig helg starta Studentmållaget på ei verkeleg dedikert veke. Måndag samla heile styret, inkludert vår travle vara, på kontoret for eitstyremøte. Me starta med å fråtsa i oss pavlova, før intensivt organisasjonsarbeid byrja. Den uerfarne vesletrælen tok på seg sekretær-jobben, då skrivaren var litt forsinka. Resultatet vart eit overdetaljert referat. Me avslutta som vanleg med å senda ein stor bunke med klistremerke.

Tysdag vart Studentmållaget invitert av Langhaugen vgs til ein norsktime. Norskklassen hadde fokus på målstrid og skriftspråka i Noreg. Då passar det godt å invitera oss. Leiar og to andre trufaste styremedlemar stod framføre tavla på Langhaugen vgs, og fortalte om språkhistorie og Ivar Aasen. Me nådde ikkje 1900-talet, før dei første spørsmåla dukka opp. Då var det gjort: Spørsmål og kritiske kommentarar hagla, og representanane våre veskla med å svara dette majoritetsoppkoket.

Studentmållaget samla seg seinare utanfor Konsertpaleet. Det var kinotid, og den etterlengta barnefilmen Reisa til Fjørkongens rike stod for tur. Fin animasjon, mange bodskapar og ikkje minst stort mangfald av dialektar hjå karakterane. Hovudpersonen sjølv, Johan, hadde sunnmørsdialekt, mora snakka rogalending, medan Fjørkongen sjølv snakka nordlandsk. Filmen fremja at ein ikkje kan lura realiteten, blanda med eit monoteistisk verdsyn.

DSC_0014

To av delegatane våre er særs klare for Landsmøte

 

På onsdag drig Kassastyraren til styremøte i Hordaland mållag, der ho tappert klarte å kapra til seg reisepengar til Landsmøtet no til helga. Den vene varaen, Anna, fann ein passande utestad til jamstillingsfesten i mai. På fredag dreg ein del av oss til Oslo for å delta på Landsmøtet. Me stiller førebudd og er ikkje anna enn gira! Me har prova, utan tvil, at me er verdas beste studentmållag!

Sameina samling på Stord

DSC_0077

Til og med trøndarar får vestlandskos!

Så kom helga alle venta på, vestlandsk venskapshelg. Fredag 6. mars drog ivrige og spente målungdommar frå Stavanger og Bergen til vakre Stord. Forutan  å vera Noregs nynorskby, var det naturleg for oss og Studentmållaget i Stavanger å samlast på halvvegen – på «Vikjo». Førebuing til Landsmøtet 2015 i Oslo stod på planen; men heldigvis fekk ein tid til å gjera så mykje meir!

Dei fleste var svoltne etter diverse buss- og båtturar. Det vart servert taco, ein utruleg eksotisk og ukjent rett frå Mexio, som funkar perfekt som ferdamat. Dei som ville, fór ut på kveldstur for å erfara denne nynorskbyen, og det han hadde å tilby. Magnhild Mjør, ein av dei mest erfarne gaidane på Stord, viste oss mellom anna innkøyringa på parkeringshuset, Kulturhuset, terminalen og fiskedamo. Sistnemnde førte oss naturlegvis inn i ein djup, biologisk samtale om kva som er mest funksjonelt av havfruer eller fiskedamer. Me står framleis utan svar.

DSC_0038

Kassastyrar og nestleiar brukte nattevakta si på å laga bollar, til glede for deltakarane

Då me friske og flotte kom tilbake til Leirvik skule, slo me oss til ro med Flukta frå Dyreskogen. Nostalgi blanda med lingvistisk kjærleik bruste i samlinga, medan Rev og Padde leia gjengen mot Hjorteparken. Me vart sitjande lengre enn det me hadde trudd, men kven kan vel forlata filmlerretet når Ugle siterer sine favoritt-filosofar?

På laurdagen sat me alle fastspente i sofaene og venta på Stord sin store helt, Bjørn Arve Lunde frå Sunnhordland museum. Herr Lunde fortalte, med teatralske innslag, om Peder Lundarstøl, ein stordabu som levde isolert med kone etter kone, og gjorde det beste ut av dårlege levevilkår. Maria Svendsen, tidlegare leiar og morsfigur, hadde førebuingskurs. Studentmållaga diskuterte lovbrigdene og arbeidsprogrammet til Sentralstyret.

DSC_0071

Nestleiar Fredrik viser stolt fram sitt kondomdesign.

Kjøkken

Av og til må leiar og kassastyrar ta ansvar for grønskaskjeringa

Seinare på dagen var det idédugnad for kva som skal stå på kondomane som Studentmållaget i Stavanger hadde investert i. Det beste sitatet fekk me sjølvsagt i frå o’store Ivar Aasen: «Når Fantestaven er vorten varm i Handi, so er han ikkje god aa sleppa». Grisepratet haldt fram til middagslaginga; Ingunn og co. mekka ei eksotisk sterk kyllingsuppe til dei andre småkåte målungdommane.

Vår kjære skrivar Aslaug tok på seg oppdraget å vera quizmeistar. Me ante ikkje kva me hadde gitt oss ut på. Quizmeistaren introduserte eige poengsystem og spørsmål som fekk hugen til å knaka. Medan somme trøyste seg med øl, tok det ikkje lang tid før me alle kunne trøysteeta økologisk Isrosa-is frå Kvinnherad.

DSC_0095

Siste samling før deltakarane dreg heim att. Nokon tek det hardare enn andre.

Dagen etter stod ikkje frukosten klar for dei morgontrøytte deltakarane. Kva hadde skjedd? Ei merkeleg stemning breidde seg i rommet, og blanda seg med kjensla av svolt. Kvifor stod ikkje nugattien der? Og agurken? Og kvifor i all verda stod kaffitraktaren der utan mursvart drikke? Før svaret kom på bordet, tok gutane initiativet og laga mat. Gutane forstod at det var 8. mars og at det var deira tur til å bidra på kjøkkenet. Me fekk ein engasjert kjønnsrolledebatt på tampen av dagen. Men ikkje få panikk; alle fekk roa seg med is og ei oppsummering før slitne målungdommar vendte snuten heim igjen til sitt urbane studentliv.

 

Årsmøte

SmiB skipar til årsmøte onsdag 1. februar klokka 19. Møtestad er kontoret vårt i Nygårdsgata 1b. Sjå kart her. Vel møtt!

Førebels saksliste:

  1. Årsmelding
  2. Økonomi
  3. Val av nytt styre
  4. Den nye tufta til NMU
  5. Aktivitetar i 2012
  6. Ymist

Kom gjerne med framlegg om saker du ynskjer å drøfta på møtet!

Niste og kviss

Studentmållaget har pønska seg fram til to lågterskelaktivitetar me vil freista gjera kvar veke denne hausten; matpakkesamling og kviss-krasjing.

Matpakkesamlinga finn stad tysdagar kl. 12, på studentsenteret. Matpakkesamlingane er uformelle samlingar med niste og drøs. Drøsen går om alt mogeleg, men siste nytt på nynorskfronten plar koma opp. Me oppmodar SmiB-ar på mindre sentrumsnære skular til å skipa til eigne samlingar, t.d. må det vera råd å få i stand noko på medisin og lærarhøgskulen. Nokon frå styret kan sikkert vera med å starta opp viss interessa er der, so sei frå til oss!

Kviss-krasjinga vil nok variera litt frå gong til gong, sidan idéen går ut på at SmiB deltek (og hevdar seg) på kvissane til andre organisasjonar og lag. Dei vert varsla etter kvart. Fyrstkomande kviss-krasj er i morgon, tysdag 13.9, kl 20 på Kvarteret! Eg fann ikkje meir informasjon om denne kvissen, men han er vel anten i Stjernesalen eller i puben nede.

Vel møtt til båe hendingane! Me treng mange SmiB-ar både for å eta nista og for å hevda oss på kviss!

Pønsk og kino på torsdag

PØNSK Torsdag 8/9 er det duka for pønskarkveld i studentmållaget! Me legg duken i Stjernesalen på Kvarteret klokka 18:00 (det er lov å komma rekande etter kvart, me vert der ei god stund) og idémyldrar saman om kva me vil gjera i haust. Me vonar mange tek turen, særleg nye medlem og de som kanskje har lyst å verta med i laget. De har sikkert mange gode idéar, som me gamle inngrodde SmiB-ar ikkje har tenkt på! Det er heilt uforpliktande og ikkje fårleg i det heile teke å koma på pønsking med oss! Vil du vera med å finna på kjekke ting med/på/kring nynorsk i haust, er det her planane vert lagde!

KINO Når me har pønska lenge og vel, og kanskje endåtil spela eit spel, dreg me i samla lag frå pønskekvelden og ser «Få meg på for faen» på kino. SmiB sponsar kinoen for medlemar! Det er såleis kjekt om de som har tenkt å vera med på kino kjem tidleg til pønskinga, slik at ein frå styret kan gå og raska til seg billettar i god tid :)

Me gler oss!

Studiestart 2011: Nynorsk smakar betre!

I år som tidlegare år stilte SmiB på studiestarttilskipingane til Universitetet og Høgskulen i Bergen. Me hadde smått med tilfang (korttilgangen til kontoret var som vanleg vorten stengd over sumaren) men jamna ut med enorm entusiasme, bokstavkjeksskilt og muffins. Dette likte dei nye studentane. Sjølve hadde me stasa oss opp i «eg <3 nynorsk»-skjortene våre. Dei nye studentane likte dei òg.

Bilete av det innbydande bordet vårt. Foto: Universitetet i Bergen.

Etter desse tilskipingane har laget fenge 10 nye medlem – hjarteleg velkomne skal de vera! I tillegg til desse var oppunder hundre studentar lystne på å få vita meir om oss, og skreiv seg opp på e-postlistene våre (det gilde, gule og fullskrivne arket du ser fremst på bordet). Sidan interessa var sopass stor, hadde me i går eit lite spontanmøte for å pønska ut kva den fyrste SmiB-hendinga dette semesteret skal vera. Me kan seia so mykje at ho er kjekk og sosial, heilt utan innslag av møteverksemd, og vil finna stad torsdag i veke 36. Meir informasjon kjem over helga! Fleire bilete frå studiestart kjem òg.

Vaflar i mai; hug, elsk og Aasen!

Torsdag 12. mai var ein dag for vaflar og verving, denne gongen utanføre SV-bygget. Vaflane var ein suksess som alltid, men nye medlem vart det lite av. I minsto har fleire studentar fenge vita um oss, ikkje berre dei nynorskvenlege HF-arane me vanlegvis dreg til oss. Me fekk mykje godhug frå samfunnsvitarane òg! Her er nokre glimt frå hendingi

Hug, elsk og Aasen – kjekke karar med fine skjorter!

GOD stemning når Odin greier ut um alle dei ubrukelege variablane som var dregne inn i dei «vellukka» fritak-frå-sidemål-prosjekta i hovudstaden.

Her byrjar det å likna på noko! Eit lite vekkjingsmøte, kan henda.

Me feira at jamstillingsvedtaket var 126 år 12. mai, og delte ut dei siste Dagverda våre.

Desse fine damene frå Samlaget lika tiltaket vårt, men ville ikkje ha vaflar. Rykte skal ha det til at dei skal skriva bok um ossvaflar, det er nok difor dei tek bilete.

Landsmøte i Noregs Mållag

Me leigde bil og drog på landsmøte i Noregs Mållag 8.-10. april på Sand i Suldal.

Landsmøtet var på Sand på grunn avslutninga av det superlange Rasmus Lølande-jubileet (fem år!).

Frå SmiB sende me, Odin, Helene og Martine. I tillegg var Martin tilstades, men då for Hordaland Mållag.

Elles drøsa me godt med Studentmållaga i Oslo og Kristiansand. Nidaros var fråverande.

Studentsamling!

I dag startar ho. Me har òg fått den syrlegsarkastiske nynorskavisi vår, Dagverd, i frå trykkeriet! Få ho på samlingi :D

Her er det oppdaterte programmet (alt som ikkje er spesifisert annanstads hender på St. Pauls):

Fredag

17.00 – Nokon kjem til å kome, innsjekking
– Middagen klar, me er klare
18.30 – Velkomen!
19.00 – Verta kjent-leik
20.00 – Slepp av Dagverd!
20.30 – Kveldsverd
21.00 – Fart og smell
24.00 – Tystnad

Laurdag

09.00 – Frukost + niste til utferd
10.00 – Arnfinn Kolerud, forfattar av Når ein fyrst skal skyte nokon
11.30 – Maskinomsetjing, nynorsk–bokmål, Kevin Unhammer
12.00 – Tur på Fløien
14.00 – Nynorskkurs med Kristin Fridtun (på studentsenteret, seminarrom B)
16.30 – Fri fram til middag
17.30 – Middag.
19.00 – Kviss med Helge Jordal (på Kvarteret)
21.00 – Fritt vilt
23.00 – Nattverd (for dei svoltne)

Sundag

09.30 – Frukost
10.00 – Stadnamsnormering, Ole Jørgen Johanessen
11.30 – Idémyldring, samarbeid mellom (student)mållaga – og korleis aktivera ikkje-aktive medlem?
13.00 – Dugurd og avslutning
14.00 – Utsjekk

Årsmøte i Studentmållaget + mat (komande tysdag) :D

Eg gløymde å skriva tid i eposten (gah!), men det er altso kl. 18.

TID: Tysdag 15. februar, kl. 18 KVAR: Nygårdsgaten 1B, 3. etasje.

Leiar i Norsk Målungdom, Janne Nygård kjem! Woo, kjendis! … nesten :D

Me tenkjer å tinga mat (truleg pizza) og ymse drykk til. Møtet er forresten opent for alle utanom beint fram nynorskhatarar.

Mobilnummeret mitt er 93 24 37 25, dersom det er noko.

Framlegg til sakliste

  1. Opning
    – Val av ordstyrar og møteskrivar
  2. Årsmelding
  3. Økonomi
  4. Arbeidsplan for 2011
  5. Val
    – Styre (leiar, nestleiar, økonomiandsvarleg, styremedlemer)
    – Utsendingar til landsmøtet i NMU (25.-27. mars)
    – Utsendingar til landsmøtet i Noregs Mållag (8.-10. april)
  6. Ymse


Vis større kart

Fleirspråk eller einfald, med Håvard B. Øvregård

Me har invitert leiar i Noregs Mållag, Håvard B. Øvregård, til å prata om fleirspråk eller einfald; om morsmålsopplæring, sidemålshat og mykje i mellom. Vert språk verdsett i Noreg?

Det heile skjer komande tysdag (26. oktober), kl. 19.00-20.00. So, kom-kom. Håvard er ein god talar, so det er ikkje noko du vil gå glipp av.

Heilhus; DJ Aasen: Norsk på ekte norsk, vellukka

På laurdag skipa brukarorganisasjonane til eit heilhus på kvarteret. Me er visstnok ein brukarorganisasjon, so me vart med og hadde Maos vesle raude-rommet frå kl. 21 heilt til me stengde baren 02.00. Folk sat inne hjå oss til 02.30 fyrr me rydda rommet heilt.

Norsk på ekte norsk (DJ Aasen)

Me hadde altso «norsk på ekte norsk», der me spelte norskspråkleg musikk. Og med «ekte»-varianten so tyder berre det at me ekskluderte alt som var for bokmålsnært. Me spelte t.d. Ravi, av di han syng på austfoldsmål (som me godt kan høyra meir av!), men ikkje DeLillos (Oslo vestkant) eller Marte Wulff (bokmål med kristiansandsk tonefall). Me er sjølvsagt ikkje mot musikken deira, men, vel, dette var vårt arrangement og då ville me konsentrera oss om det som er mest interessant for oss ;-)

Fisking

Me hadde fisking, som de truleg kjenner frå barneselskap i ungdomen. Der fekk folk godteri og ymse nynorsk tilfang. Overraskande nok viste det seg å fungera ganske bra (var berre eg som var overraska, forresten). Folk såg ut til å lika det. Spesielt i byrjingi då Helene var veldig flink til å dra inn folk som stod i døropninga og lurte på om dei turte å gå inn.

Korleis gjekk alt saman?

Heilt frå starten av var det god stemning. Eg ville ikkje tru at folk kom før sein-seint, som normalt her i Noreg (forspel, altso :/ ), men det var oss 5 frå SmiB pluss 2-6 andre der inne heile tidi. Sidan Maos vesle raude er eit so lite rom so treng du ikkje so mange folk for at det skal sjå moro ut.

På det meste hadde me vel truleg rundt 20 dansande folk i rommet. Det var dansing omtrent utan stopp heile tidi; nesten 5 timar!

Halvvegs uti vart me vitja av nokon som digga trønderrock. Eg trur den demografien er ganske lite tilfredsstilt i Bergen by, so dei spurte heile tidi om meir Åge Aleksandersen, DDE osb. Dei var med oss til slutten. Det vart kanhenda litt mykje til slutt :P Sjølvsagt ispedd ein heil del annan norsk dansemusikk.

Me spelte mykje av:

  • Valkyrien Allstars
  • Kvelertak
  • Kaizers Orchestra
  • Odd Nordstoga
  • Tog
  • Lars Vaular
  • Casiokids
  • Skambankt
  • Hellbillies
  • Hopalong Knut
  • John Olav Nilsen og gjengen
  • Rammsund
  • Gåte
  • DDE

Og mange-mange fleire…

Til slutt

Det heile gjekk altso veldig bra. Sers vellukka. Det var ikkje mykje jobb, og det var veldig koseleg. Det var ikkje fullt rom (rommet tek 30 stk), men heile heilhuset var ikkje so veldig mykje blesta, og det var ikkje so mange folk totalt på bygget.

Fekk tilogmed høyra frå ein av dei tilsette at me hadde det livlegaste rommet! ;D

Til slutt ein kort video frå 22-ish på kvelden. Det ser ekstremt mørkt ut, men det er berre objektivet eg brukar til kamera som er so ekstremt lite ljossensitivt (hadde ikkje andre med meg).

Oi, videoen er /skikkeleg mørk og dårleg/, det ser eg no, jaja. Han viser litt stemning ;]

Heilhus i morgon (i dag)!

Me er (laurdag kl. 21.00–) i Maos vesle raude. Her skal me spela Norsk på ekte norsk. Dvs. på øvste hylla er musikk med nynorsk sangtekst, på ant øvste hylla er songar på ikkje-oslo-vest-dialektar.

Med andre ord speler me Ravi (austfold!), men ikkje t.d. DeLillos eller Marte Wulff (diverre høyrast det ganske bokmålsk ut, men ho er i ♥ lell!)

Utruleg koseleg om du kjem ;-)

Vert vel truleg litt kaféstemning i starten, og so speler me dansbar musikk utyver, dersom noko skulle kjenna trongen. Vonar det, i so fall.

Veit ikkje heilt om Maos vesle raude eignar seg for slikt då? Då får me i so fall berre visa at me klarar det likevel. Og, hugs, me kan ikkje taka kort der, so ha med kontantar (evt. berre kjøp i ein annan bar).

To Valkyrien Allstars-konsertar

Sist fredag var me på konsert med Valkyrien Allstars. Me klarte å få 50 kr rabatt frå Hulen, det kom 4-5 medlem utanom oss 6 i styret. Me selde 2 EGNYNORSK-t-skjorter, og kunne seld fleire dersom folk hadde hatt meir lommepengar. Me høyrde mange godord om dei.

Bilete teke på konserten av Elisabeth Almighty.

Sidan me brukte t-skjortene som ein samla gjeng på ein konsert, vart det likevel litt vel uniformete. So det kunne diverre sjå ut som om me hadde bryte oss ut frå ein institusjon. Det er noko me må hugsa til neste gong; folk må ikkje ha heilt like klede. Farge- og motivforskjellar er ein veldig bra ting. Heldigvis gjekk me ikkje alle i det same, so det gjekk bra ;-)

Konsert, nr 2

Same dag, ein god del timar seinare, spelte Valkyrien ein minikonsert på Det Norske Teatret for Studentmållaget i Oslo sitt 110-års-jubileum. Denne gongen brukte Tuva t-skjorta ho hadde fengje av oss etter konserten på Hulen.

Sers moro for oss ;-)

Pønsk + Valkyrien (rabatt!)

I morgon (1. september) har me pønskekveld for å finna ut kva me skal gjera frametter. Kom innom!

  • Ta deg ein munkholm/kaffi/saft/hansa eller kva-har-du.
  • Funder på kva me skal gjera frametter.
  • Få signert medlemsprov slik at du får 50kr rabatt på Valkyrien Allstars-konserten på fredag.
  • Få (evt. kaup) t-skjorte til konserten dersom du ikkje allereie har.

Stjernesalen frå kl. 20. Eg tek på meg ei nynorskrelevant t-skjorte slik at det vert lett å sjå oss. :-)

Me sit der minst ein time. Kjem sikkert litt tidlegare òg.

Ring meg/send melding viss du føler for det. 93 24 37 25 :-)

Valkyrien Allstars-konsert på fredag 3. september

Hola (Hulen) har vore so greie å gjeve oss 50kr i rabatt på billettane til Valkyrien Allstars no på fredag. Du må diverre ha med deg medlemslappen som prov, men fortvil ikkje dersom du som alle andre har mista han; me kan laga ein ny til deg viss du:

  • Kjem innom på pønskekvelden på Kvarteret, onsdag 1. september kl 20
  • Kjem på før-konserten-henging hjå Diederik, (eg drikk saft, andre øl, ta med det du vil, Professor Hansteens gate 85, 100m frå Hola) kl. 19-21.
  • Møter opp utanfor Hola litt før 21
  • Eventuelt sender epost/ringjer for å få skaffa prov (93 24 37 25 / smib hjå nynorsk.no)

Konserten startar 22.30, men det vert truleg fullt, so me møter opp 21 for å vera trygge på å få billett.

Kult viss so mange som mogleg kjem i nynorskrelevante t-skjorter ;-) (Helst gjer det!) Me tek med oss t-skjorter som er gratis (SmiB-t-skjortene) og som kostar litt (EGNYNORSK) der me er.

So sjåast me på før-konsert-henging hjå Diederik, eventuelt rett på konserten!

Studenttorg på studentsenteret, 15 nye medlem(!)

For nokre dagar sidan hadde me stand på studentsenteret. Det viste seg å vera ganske so lurt. Ida og Helene klarte å verva 15 medlem på den dagen. Vel, ei av dei vart verva av Odin, men ho var allereie innstilt på å verta medlem.

Me gav ut gratis t-skjorter til alle som vart medlem (og alle som allereie var medlem). Det er av typen «Studentmållaget i Bergen» med Ivar Aasen på. Dei var veldig populære. Me har framleis mange av dei, so dersom du ikkje har fått ei (og er medlem i SmiB), so berre sei i frå, so får du ei.

Mange vart frista til å verta medlem for å få dei flotte jakkemerka som me fekk frå skrivarstova Oslo (men dei er teikna av ein SmiB-medlem ;-) ). Diverre fekk me alt for få, so me måtte rasjonera dei ut ved å berre gje til medlem (og putta ein latterleg høg pris på dei dersom du ikkje var medlem). Det viste seg faktisk å fungera som eit slags triks, sjølv om veldig mange vart veldig lei seg då dei ikkje fekk.

Me må verkeleg få laga ein liten engelsk tekst/flygeblad som forklarar godt kven/kva me er. Det er veldig mange som ikkje kan norsk som lurer på kva me er og kvifor me står der og heng. Det er faktisk noko som står i gjennomgangen frå tidlegare sokalla «studenttorg» (eller studentopningsseremoniar?) i Grieghallen.

Forresten treng me òg nytt/eige informasjonsflygeblad. Veldig-veldig mange av dei som gjekk forbi strekte seg automatisk mot verveblokka, den med EGNYNORSK på. Det viser seg at det er mykje meir interessant enn alle dei andre flygeblada våre, so her må noko drastisk setjast i gang! :-)

No byrjar me so smått å planleggja hausten. Me må få til eit par hendingar som andre enn styret kan vera med på. Det er moro å stå på stand, men det involverer omtrent ingenting av medlemsmassen vår.

Hendinga var på alle måtar totalt vellukka.

Klistremerkeaksjon på sydneshaugen

I går og forrigår delte me ut klistremerke og vaflar på HF-bygget her i Bergen. Det var ein sers velukka aksjon der me fekk delt ut fleire hundre klistremerke og nesten like mange vaflar. Det heile gjekk over fire dagar;

Me starta på sundag med å finna gamle lysingar og illustrasjonar frå gamle blad. Me fann masse kult i FOLKEMÅL frå 80-talet og kopierte upp. Til slutt hadde me ein heil del lappar som Helene og Ida hang upp rundtom HF på måndagen.

På aksjonen var det fleire som hadde sett det og synast det var kult. I fylgje jentene fekk spesielt jentedassane særleg god lappedekning. Me lagde òg plakatar til å ha på bordet.

På måndags kveld var eg sjølv på Austevoll, medan Helene og Ida lagde vaffelrøre på kontoret av det eg hadde kjøpt inn tidlegare.

Det vart fleire litre. Eg vil tru me hadde rundt 13 liter vaffelrøre klår til tysdagen.

So starta aksjonen. Me fekk verva 7 stk. Ganske tilfeldig eigentleg, me prøvde jo eigentleg ikkje å verva folk. So dimed var det ekstra kult at so mange sette seg opp utan nokon som helst «smøring» eller hinting.

Dagen etter (onsdag) vart det ingen vervingar, men mange folk skreiv seg opp på eg-vil-vita-kor-tid-nynorskkurset-er-lista vår.

Me gav vekk eit heilt drøss klistremerke. Det vart vel fort ein 600-700 stykk (!?). Iallfall i kor mange klistremerke me plutseleg manglar! So ikkje berre forsvann nærare 26 liter vaffelrøre, men eg trur me må tinga fleire klistremerke snart óg.

Hugs at du kann få dei gratis tilsendt so lengje lageret rekk.

Årsmøte

SmiB skipar til årsmøte torsdag 28. januar klokka 18.00! Møtestad er portalen til Sydneshaugen skule, som ligg rett bak Johanneskyrkja. Illustrasjon:

(Berre å gå etter Ivar Aasen, så finn de fram!)

Ei førebels saksliste

1. Godkjenning av innkalling og dagsorden. Val av ordstyrar.

  1. Årsmelding og arbeidsprogram
    • Aktiviteten i laget i 2009, og det me vil gjera i 2010.

3. Økonomi

4. Val av nytt styre

5. Landsmøtet til Norsk Målungdom 19.-21. mars – Vil du vera utsending?

6. Anna